瘦身的迷思
在一間 Gym 內﹐跑步機上有兩個人…
美女﹕Hi!好耐無見喇﹐近排點呀﹖你面色好似麻麻喎。
醜女﹕近排真係麻麻地﹐要儲錢去纖體﹐搞到無淡好食。
美女﹕o下﹗點解要咁做呢﹖你好地地做乜要去減肥呀﹖
醜女一邊跑步一邊喘氣。
醜女﹕唉…你唔明架喇﹐我地D又肥又醜既人﹐出黎搵工好難架。出街又成日俾人笑﹐搞到個人無哂自信﹐無哂社交圈。
美女﹕點會呢﹖搵工係講實力同埋經驗架﹐關個樣乜事呢﹖同埋你以前好樂觀架﹐點解而家無哂信心架﹖
醜女﹕而家係人都知肥人無自信架喇。你睇D電視同報紙廣告都係咁講架喎。你知唔知有個調查顯示英國辦工室既靚女員工薪酬平均高出醜員工3成﹐喱個就已經證明靚女有著數啦。我咁肥﹐又矮﹐又樣衰﹐人工起碼低人一半啦。
美女﹕但係你有無留意﹐所有事業成功既女人都係好樣衰架﹖咁咪證明醜女人更容易上位囉。
醜女﹕上到位都會俾人笑無仔溝啦。佢地無拖拍咪專心做野囉。但係我咁大個女都未拍過拖﹐我真係好想有人追﹐我好恨拍拖架﹗你明唔明﹖
美女﹕我又真係唔明﹐有拖拍都唔知幾煩﹐想要D私人空間都無。
醜女﹕你就梗係講得口響啦。你好彩﹐生得靚﹐大把人追﹐梗係可以講風涼話啦。我呢﹖成班人出o黎玩﹐去溝仔﹐次次都係得我無人吼。成日聽阿邊個邊個話唔知揀邊個男仔好﹐我都唔知幾羨慕。有得揀喎﹗我邊試過呀﹖連俾人揀我都未試過呀。如過我唔去大執個樣一劑﹐我成世都係咁架啦。
美女﹕唉…你以為我好好﹖係我係生得靚﹐但係我係公司無論做到幾好﹐D女事都話我升職加人工係因為同老闆有路。
醜女﹕咁有無先﹖
美女﹕梗係無啦。不過我老闆都好想﹐佢成日借機會搭我膊頭﹐有次仲摸我大脾添呀﹗
醜女﹕咁你唔告佢﹖
美女﹕告佢咪同自己倒米﹖公司點會俾我留低呀﹖去見工時人地問我點解唔做上一份工﹐唔通你同人講話你老闆搞你咩﹖
醜女﹕但係你起碼多人追啦﹐咁多男人任你揀﹐開心死啦。
醜女一邊跑步﹐身上肥肉不停跳動。
美女﹕你以為我好開心﹖個個男人見到我都想溝我﹐成日打電話黎﹐真係好煩架。有D仲係我D客﹐我推佢地一兩次約會就連我張單都 Cancel 埋。係公司又俾其他女同事杯葛﹐話我係姣精。老闆D老婆又驚我搞佢老公﹐叫我老闆調我番大陸做野。
醜女﹕起碼你仲有男朋友陪丫
美女﹕男朋友仲衰。溝得我既都係想同我上床﹐唔同貪我聰明咩﹖有D仲同D friend 賭話7日內要同我搞野。搞完仲好神氣咁同D friend 講話我身材點好點好﹐功夫又點。想搵個對自己好既人都無。所有人都只係識得欣賞我外表﹐無人明我內心。但係你就唔同。你D同事會當你係 Friend﹐因為你無威脅性。你唔駛驚D男仔成日想『乙水』你上床。追你既人只會欣賞你既內在美。
醜女﹕但係香港人個個都係睇外表架啦。
美女﹕一日都係D無良商人﹐日日係電視雜誌同我地洗腦。話肥人無自信﹐無地位﹐無前途。其實係想昆你去報名纖體咋。點知D香港人真係咁笨﹐以為佢講真。
醜女﹕聽你咁講﹐做靚女同醜女都係各有壞處﹐就算我變成你咁靚都有其他問題。真係多謝哂你﹐聽日我請你飲茶丫。
美女﹕Sorry 呀﹐我聽日開始放大假喇。
醜女﹕咁下次啦。拜拜。
美女﹕拜拜。
＊ ＊ ＊
此時醜女已汗如雨下﹐剛巧有服務員經過。
服務員﹕你地頭先咁好傾﹐好熟架﹖
醜女﹕係呀﹐大學同學囉。
服務員陰陰一笑。
醜女﹕點解你個樣咁既﹖
服務員﹕…無…無事
醜女﹕講啦﹐唔係我下次去溝仔唔預你架。
服務員﹕…其實…我個Friend係醫院做既﹐佢話我知美女其實book左聽日去做變性手術之嘛。
by落花流水@沉睡森林
菜菜子 said,
April 15, 2007 @ 11:32 am
我都覺得而家o既風氣係瘦即是美, 廣告商真係好成功囉. 我唔高, 但九十幾磅一樣有人話我肥, 著短袖衫時仲玩我d拜拜肉, 有時都好無奈….. 聽聞而家歐洲開始限制唔俾d model過瘦或用唔健康o既方法減肥, 否則就唔俾佢地出show, 而且鼓勵設計師設計唔同size o既衫, 都o岩o既, 起碼等d人覺得唔係飢民先著得d衫好睇嘛….
♥ WeT FaI ♥ said,
April 15, 2007 @ 11:32 am
hmmm…… 好彩我唔靚又唔醜 , 只係肥左 d , 所以唔洗搞咁多野~~~~~~
poonwinghang said,
May 1, 2007 @ 3:27 pm
哈，都係咁講，唔同既人就會人唔同既煩惱
不過嘛，可能瘦／靚人既煩惱會比較美麗ｄ掛
sinla said,
June 18, 2007 @ 12:26 pm
,,我都觉得上面讲得几安葛,美女同埋丑女都有自己晤好葛地方…不过我都好烦自己呢?.太瘦啦,165cm.先86斤,我自己都觉得晤好葛….点先能肥呢/?