與小子談戀愛
小子﹕一點紅哥哥﹐今次篇文個名好易令人誤會你係基架喎﹗
一點紅﹕采﹗談戀愛嘅意思係討論戀愛呀﹐死蠢﹗你毛都未出齊﹐我會吼你咩﹖
小子﹕乜唔係毛都未出齊先得人鍾意架咩﹖
一點紅﹕你個死嘢﹐你仲玩﹗
小子﹕好啦好啦﹐言歸正傳啦﹐你有無談過戀愛呢﹖
一點紅﹕梗係有啦﹐我拍拖嗰陣你仲未投胎呀﹐世姪。
小子﹕吓﹗咁你嘅初戀係幾時呢﹖
一點紅﹕(徐徐呼出一口煙) ﹐係我13歲嘅時候。
小子﹕嘩﹗人細鬼大呀你﹗對方係咪你D同學呀﹖
一點紅﹕梗係唔係啦﹐係我補習老師﹐大我8-9 年。
小子﹕唔係啩﹗佢係咪貪你屋企有錢咋﹖
一點紅﹕痴線啦你﹐我屋企好窮架。佢對我好好架﹐不過我嗰時太細個喇﹐唔係好識得對人好﹐而家諗番都有D過意唔去。
小子﹕咁你地有無曳曳呀﹖
一點紅﹕梗係無啦﹗我地好純品架﹐最多都係錫下之麻。
小子﹕咁拍咗幾耐呢﹖
一點紅﹕都有成年半架﹐後來我識咗D同我年紀差唔多嘅女仔之後﹐就慢慢同補習老師疏遠咗啦。
小子﹕咁你哋而家仲有無聯絡呀﹖
一點紅﹕近幾年無啦﹐不過10年前佢結婚我都有去觀禮﹐算係咁啦。
小子﹕之後你仲同D咩人拍拖呀﹖
一點紅﹕好多喎﹐講到聽朝都未講完呀﹐我揀D精彩嘅講吓吖。我試過做第3者﹐試過同D竹星妹拍拖﹐試過係街度識女仔﹐試過撬朋友牆腳﹐試過追 Tomboy﹐試過同有夫之婦一齊。
小子﹕嘩﹗真係好精彩喎。咁你有無試過One Night Stand 呀﹖
一點紅﹕咁有無喎﹐我唔係咁嘅人嚟。
小子﹕咁你覺得邊段情最深刻呢﹖
一點紅﹕每一段都深刻﹗真架﹐我而家成日都有諗吓佢地﹐唔知佢地過得好唔好呢﹖
小子﹕咁你有無試過失戀呢﹖
一點紅﹕梗係有啦﹐好傷架。好多年前我鍾意一個 Tomboy﹐咁我就去追佢啦﹐人地都唔鍾意男仔嘅﹐就梗係唔理我啦。我前前後後都等咗佢幾
年﹐後來先至放棄。嗰次好傷。
小子﹕抵死啦﹐人地鍾意女仔架嘛。
一點紅﹕我都知﹐但係我想佢試吓同男仔拍拖係唔同架嘛。後來無聯絡咗幾年﹐有一日佢突然打俾我﹐話想試吓同我一齊。嘩﹗我真係發夢都
無諗過呀。開心到我差D心臟病呀﹗
小子﹕等咗咁多年﹐守得雲開見月明﹐你地一定好開心啦﹗
一點紅﹕世事真係好奇怪。我之前對佢咁著迷﹐但係真係一齊嘅時候竟然覺得性格好唔夾﹐幾個月我地就散咗喇。咁多年嘅期待﹐換嚟咁短暫嘅快樂﹐真係好唏噓。可能真係愈得不到愈想得到。
小子﹕咁你拍咗咁多次拖有D乜嘢體會呢﹖
一點紅﹕我覺得拍拖就好似照鏡咁﹐係對方身上睇到自己。你拍拖拍得愈多﹐就愈了解自己﹐咁你下一次拍拖嘅時候就會識得揀一個更適合你自己嘅人。慢慢﹐你就會搵到你嘅真愛。你揀人時人揀你﹐如果你嘅情人為咗一個比你好嘅離開你﹐你應該祝福佢。
小子﹕你係咪 Short 咗呀﹖
一點紅﹕我講真架﹗我將來結婚一定會當眾多謝我以前嘅女朋友﹐佢地教識我好多嘢﹐我會代我將來老婆多謝佢地。同時我都會叫老婆唱首“給我愛過的男孩” 俾佢以前D男朋友聽。
小子﹕如果係咁我諗你未來外母可能會衝上台攞刀斬你…
by 一點紅@沉睡森林
Emily^^ said,
June 10, 2007 @ 5:35 pm
紀搞笑
詠琪 said,
June 17, 2007 @ 4:50 am
請問你現在的感情狀況是如何?
那你對婚姻有什麼看法?
一點紅@沉睡森林 said,
June 17, 2007 @ 10:59 am
我現在感情生活美滿﹐有個非常要好的伴侶。對於婚姻我是正面的﹐我覺得婚姻是對對方地位肯定的一個表現﹐當然﹐並不是每段感情都會開花結果﹐但我相信只要努力爭取﹐應該會找到的﹗詠琪妹妹﹐你有如何呢﹖