Puppy Love
不經不覺，自己已經到達 30 歲之齡，時間真係瞬間即逝。
睇番轉頭，呢 30 年裡面，自己成長既起伏都好大，曾經開心過、曾經跌過、曾經傷過亦痛過……
好記得讀幼稚園既時候，好多時父母都唔得閒接我同哥哥放學，我地永遠都係最遲走既學生，但先生校長都好體諒，每日都等我爸爸收工接左我地，佢地先收工。
到小學，我轉過三間學校，第一間讀左兩年就轉左去寄宿學校，主要係因為媽咪同爸爸唔知咩原因嘈起上黎，媽咪就離家出走左，咁我地幾兄妹冇人照顧，爸爸又要番工，所以送左我地去調景嶺讀寄宿學校。讀左三年，因為哥哥要出番黎讀中學，所以我同妹妹就一齊出黎，又轉左第三間小學喇。
但我過得最開心既係寄宿學校個幾年，雖然同妹妹分開左唔同宿舍，但識到好多黎自唔同家庭既同學，大家一齊讀書，一齊番學，感覺自己多左好多姊妹咁，好開心架。
記得學校係分長短週，我地短週先番屋企，長週就留係宿舍。長週都有好多人會留係宿舍，多數都係因為大家都住得遠，一來一回可能要半日，留係屋企一日都冇就要番宿舍，為左慳時間同金錢，好多人都會留番係宿舍。
係呢幾年每一日都好有規律，定時起身、定時番學、定時食飯、定時睡覺，亦因為咁養成我對時間觀念睇得幾重。每一日都係定好左，亦會有輪班要 d 宿友去做一 d 家務。高年級既姐姐要照顧 d 低年班既宿友，所以大家感情會好似一家人咁。
而我既初戀亦係呢度發生，雖然唔講得好浪漫，但都幾好笑幾開心。佢唔係同我同一班，但大家經常都會見到，記得有一次佢突然間係我耳邊大叫，嚇左我一跳，跟住就成日覺得佢想整蠱我，我就成日想避開佢。點知有一日，佢突然跟我入廁所，捉住我問我點解要避開佢，當時見到佢咁真係有 d 驚架，梗係啦，佢入女廁喎，但我都答佢因為怕佢又黎整蠱我，然後佢好認真咁同我講，想同我一齊，問我點。個刻邊識答佢姐，叫佢俾時間我諗下，佢亦放開我俾我走，一見佢放我，我連廁所都唔去就走左喇。
後黎幾日，竟然見佢避我喎，覺得發生咩事呢？同 d 同學口中知道，原來佢怕我拒絕佢，佢會好瘀，所以想扮咩都冇發生，個刻覺得呢個人幾好笑。而我亦係第五日寫左封信俾佢話佢知我既答案，我諗大家都知結果喇。
同佢一齊之後，因為哥哥同佢同一個宿舍，做阿哥既就梗係叫佢唔好蝦個妹啦，而宿舍所發生既事係冇秘密既，所以好快我地既事就全校都知……記得有一次發生左件事，有一個唔知咩班既人，我對佢一d 印象都冇，突然間係個飯堂大叫好鍾意我，嘩…嚇得我，我唔知佢知唔知我入緊飯堂，但當聽到佢講呢番說話，我連飯都唔食就走番宿舍。後黎男朋友仔知道梗係對呢個人有所表示啦，但佢對個人做左 d 咩我真係唔知，只知道呢個人後黎成日俾人用呢件事笑。
始終都係寄宿生，我地既範圍都係學校裡面，所以唔可以叫真正既拍拖，只係其他人眼中，我地係一對既。我地亦只係小息時間聚下，放學既時候送我番宿舍(但其實我地既宿舍亦係學校裡面，女生宿舍係六樓，男生宿舍就係五樓，課室就係一樓至四樓)。係一段好純真既感情。
其實同佢一齊亦係短短幾個月，因為同佢一齊個一年係我最後一年寄宿，之後就如我之前所講要跟哥哥出番去讀書，畢業個日都有見到佢，但大家都冇野講，亦唔知講咩好，亦冇留底任何聯絡電話或地址，結果我既 puppy love就咁就過去喇。
by 傻媽媽@沉睡森林
落花流水@沉睡森林 said,
August 27, 2007 @ 10:43 pm
你會想知道他現在如何嗎﹖在街上見到面還會認得對方嗎﹖
勝瓜小拳王 said,
August 28, 2007 @ 12:22 am
有沒有寫畢業紀念冊呢？那些甚麼「我倆情誼比天長」…
傻媽媽 said,
August 29, 2007 @ 12:03 pm
落花流水 - 初時都會想知佢而家係邊，或者現況係點。但隨著時間流逝同我生活上既改變，冇再諗起佢喇。而且相信就算係街上遇到，大家都唔會記得大家。咁多年我由一個小女生變成一個媽咪，好難令人想像既，不過到而家我重記得佢叫咩名。可能見到 D 仔女慢慢長大，自己想感情方面有著落，所以諗番起自己呢段 PUPPY LOVE。
勝瓜小拳王 - 當時調景嶺呢個地方好似一個小村莊咁，唔興寫紀念冊架，電話亦唔係好興，所以就算要走，都可能剩係留低地址大家用書信聯絡。但出到城市就好懶寫信，慢慢都會失去聯絡。
Toey said,
November 14, 2007 @ 3:36 pm
hihi~ 介唔介意我問下… 以前 調景嶺 係唔係得一間 寄宿學校?.?
因為 我果時都係0係 調景嶺讀過~ 不過我果時係?K1.. 亦都只係讀左一年ja~ 但一路以黎我都好想知 間學校叫咩名~學你話齋~ 0係 寄宿 讀0既日子真係好開心… 所以 我都好想搵番果時d朋友仔^^