火都嚟﹕睇電視
一點紅不嬲都好少睇電視﹐因為多嘢做﹐所以都係睇吓新聞之類。早幾日無聊扭開電視﹐見到三色台播嗰套“再會歡樂今宵” ﹐成班藝員白白痴痴咁係度唔知搞乜春﹖又老土﹐又唔好笑﹐仲播番D陳年片段﹐以為好好睇。真係仆佢個街。
其實宜家D電視節目真係質素差到無人有。有套“金枝慾孽” 彈出咗﹐就嗱嗱林拍番一打一模一樣嘅片﹐每幾個月就拎套出嚟播﹐荒死大家唔覺悶。“一號皇庭” 掂咗﹐就拍夠5套續集。過時過節就整套“流金歲月” 、“創世紀” 、“天地豪情” 、“歲月風雲” ﹐套套一模一樣。總之就係兄弟反目 + 4角戀 + 豪門恩怨 + 身世之謎 + 誤會重重 + 作奸犯科 + 昏迷 + 大團員結局。遊戲節目清一色抄外國﹐跟住每年整番幾個“耀保良” 、“滿東華” 再加個勁歌決賽。超﹗駛乜六嬸做話事人﹖我做都得喇。
點解班友唔可以應真D﹖外國有 Prison Break、Heroes、Lost、ER、Sex in the city﹐香港就乜Q都無﹐真係灰。
另外個台仲悲哀﹐連佢做緊乜劇我都唔知。所以話慣性收視真係令我地無哂選擇。而家又話出高清﹐又有D 42寸嘅LCD電視﹐但係用嚟睇電視真係徙料﹐好彩我部電視可以駁落電腦睇戲先至無咁嬲咋﹗
真係好懷念“大時代” 、“馬場大亨” 、“楚留香” 、“射鵰 (黃日華版) ”
by 一點紅@沉睡森林
gucci said,
November 2, 2007 @ 10:21 pm
絕對認同
無一d節目睇得過
天馬行凶 said,
November 2, 2007 @ 11:39 pm
早點開電視,有奸人堅,激好睇。
明天12點開電視,有死亡筆記,較日語音
水靈玥 said,
November 3, 2007 @ 6:49 am
而家嘅TVB真係愈來愈無聊
我都頂佢唔順
所以我而家我好少睇電視
通常都係睇Animax
Betty Lam said,
November 5, 2007 @ 10:35 am
最近的奸人坚,实在是无聊之中的无聊, 武打不是武打, 古装片讲现代话. 我都几喜欢黄子华, 叫他拍这类型的片实在是浪费.
貓空子 said,
November 7, 2007 @ 11:25 am
奸人堅部野令我失望, 同幾年前的男親女愛差好多皮! 覺得不是黃子華的問題(老實講,佢在奸人堅裡面演得幾生鬼),而係劇本的問題!
而家香港的喜劇都唔好笑了! 冇晒以前搞笑節目的神髓~!
42吋高清睇電視真係side料,不過拿來玩xbox360/ps3/睇dvd, 就會覺得物有所值!!!