哭
前幾日同個男性朋友傾開計，佢講佢女朋友好鍾意喊，小小事都喊餐死，搞到佢都唔知點算。佢就問我，喺咪女仔都鍾意喊，同埋，有咩辦法可以幫幫佢…
咁身為一個女性，喺女性角度嚟講，喊都有好多原因嘅，但至於用咩方法解決，就好視乎個女仔咩原因喊喇。
但我都問過身邊一啲男性朋友及同事，佢地有啲會想盡辦法去哄番個女朋友、有啲就唔理佢，由得佢喊飽為止，有個仲好笑，話大大聲咁同佢講，你好收聲喇，唔喺打你架，我諗佢都喺講笑居多。
喊對於女性嚟講其實好普通，同食餐飯一樣咁簡單，俗語都有講 –{女人喺水做}，有咩咁出奇，問題喺係男性角度會覺得好不知所措，有啲甚至乎會覺得煩添。我自問自己都喺一個好眼淺嘅人，有時候睇報紙見到啲新聞，睇電視有啲劇情好感人，自己都會喊。
人喺一種有血有淚嘅動物，不論男女都會喊，可能男人會收埋，而女人比較鍾意表露出嚟姐，其實冇咩咁大不了。要去諗用咩方法解決，不如諗下因咩事個女朋友要成日喊仲好啦，我諗佢都喺想身邊人留意多啲自己，錫自己多啲，關心多啲自己姐，其實做男人嘅，只要身邊嘅女朋友唔喺咁 {得寸進尺} 嘅話，咪對佢咩都多啲啲，我諗問題應該唔再喺問題啦呵？﹗
by 傻媽媽@沉睡森林
天馬行凶 said,
November 4, 2007 @ 5:43 pm
我係女仔，但同時都唔鍾意喊……
遇到唔開心既野我寧願去食朱古力、訓覺
可能因為我身邊既家人唔容許我喊，一喊就俾人打的：ｐ
傻媽媽 said,
November 5, 2007 @ 12:36 pm
天馬行凶: 點解你屋企人唔俾你喊呀？其實喊係一個發洩情緒既方法，開心好，唔開心好，發洩下係好架。不論原因係咩，唔開心一定要搵個方法去令自己舒解一下，食朱古力都好，但唔好過量喎。
天馬行凶 said,
November 5, 2007 @ 5:11 pm
我唔知阿，我細個一喊就會俾人打……除左有次食波餅喊之外，我都成幾年無喊過。
我好鍾意食朱古力架，特別係７２％果隻，，一次食一小塊咁
（點解你中午都ｏｎｌｉｎｅ到既？）
傻媽媽 said,
November 5, 2007 @ 5:20 pm
食朱古力黎舒緩心情，最好係食黑朱古力，我記得有研究提過。(點解我中午 online？因為我係公司食飯時間得閒囉，平時番到屋企又要煮飯又要做家務，所以好少夜晚上網。)
天馬行凶 said,
November 5, 2007 @ 6:34 pm
我鍾意黑朱古力，甜甜地苦苦地~
番工真係好，可以中午ｏｎ
Vane said,
November 10, 2007 @ 1:14 am
唔知点解近年嚟都比较钟意喊，係咪因为人大个咗会比较感性啲呢…