比較
97年回歸之後﹐拜偉大祖國所賜﹐香港人嘅生活裡面大量湧現新嘅詞彙。好似『打造』﹑『板塊』﹑『業績亮麗』﹑『政策出台』﹑『到位』等等﹐數之不盡﹐而且日日新鮮。今日想同大家討論吓嘅就係『比較』喱個詞語。
你可能會諗﹕唔係喎﹗『比較』喱個詞語不嬲都有㗎啦﹐唔好乘機屈大陸喎﹗的而且確﹐『比較』唔係一個新詞﹐但係『比較』今時今日嘅用法係唔同古時嘅﹐請留意以下例子﹕
例子(一) (股票行門口)
陳師奶﹕喂﹐李師奶﹐你覺得買5號仔定係941好D呀﹖
李師奶﹕梗係941啦﹗因為業務比較穩定D﹐而且現金流比較強﹐派息率比較高﹐PE比較低。
例子(二)(電視廣告 - 關於食物標籤﹐近排日日都有播)
旁白﹕我地揀食物嘅時候要選擇比較低糖﹑比較低脂﹑比較低鹽嘅食物呀﹗
例子(三) (大陸飯局)
黃總﹕周局長﹐這兒的魚翅可以嗎﹖
周局長﹕比較好。
黃總﹕那麼﹐等一下我們去夜總會好嗎﹖
周局長﹕比較好。
黃總﹕嘻嘻﹐我們公司的稅務安排就得靠周局長你了。
周局長﹕那個比較好辦﹐你放心就是了。
例子(一) 係好typical嘅用法。李師奶係比較緊兩隻股票嘅分別﹐所以用『比較』喱個詞語係正確嘅。而例子(二)就麻麻地﹐因為係個廣告裡面其實無講到比較緊D乜﹐所謂『比較低糖』究竟係點解呢﹖每100ml含16g算唔算低呢﹖如果有兩罐汽水﹐一罐每100ml含16g糖﹐另一罐含12g糖﹐係咪我地就應該揀『比較低糖』嗰罐呢﹖(註﹕其實兩罐含糖都過高﹗) 。估唔到而家政府嘅宣傳片質數咁低﹐真係好多謝偉大祖國嘅薰陶﹗例子(三) 就更絕﹐條友無論講乜都加『比較』喱兩個字。喱個用法可以講係空洞無物﹐佢根本就唔係比較緊兩樣嘢﹗其實周局長只要講個『好』字就得﹐唔駛扮晒有禮貌。大家唔好笑﹐例子(三) 嘅用法係大陸非常普及﹐起碼有90%嘅大陸人係咁講嘢嘅﹐問你死未﹖
咁查實點解班大陸佬會咁講嘢嘅呢﹖原理好簡單﹐就係虛偽。點解呢﹖你試諗吓以下嘅對白﹐如果無咗『比較』喱兩個字會變成點﹖
黃總﹕聽說你的二奶很漂亮啊﹗
周局長﹕(自豪地)這個嘛﹐比較好啦。
黃總﹕好像只有17歲﹐是吧﹖
周局長﹕(更自豪地) 哈哈﹐是比較年輕啦。
黃總﹕有空借我玩玩可以嗎﹖
周局長﹕(乾笑)這個嘛﹐比較…比較…
好多大陸人為咗扮謙虛﹐於是就搬出『比較』喱兩個字。佢地覺得『比較好』無『好』咁直接﹐如果成日咁 definite 咁講嘢會好囂﹐所以就乜都加『比較』﹐久而久之就成為習慣。但係我哋知到喱個用法係錯嘅﹐因為如果你無兩個 Object 去Compare﹐咁就唔應該講比較。費事教壞細路。
而家係香港成日聽人講『比較乜』﹑『比較物』﹐真係哽耳。
by 一點紅@沉睡森林
