一點紅﹕喂﹗o靚仔﹐就嚟放完暑假喇喎﹐有咩搞過呀﹖

小子﹕你咪阻住我啦﹐我九萬幾樣嘢未做呀﹗

一點紅﹕放成三個月假﹐有乜都應該做完啦﹗你係咪掛住玩呀﹖

小子﹕你傻啦﹗我個schedule排得密過劉華﹐一日做足16個鐘non-stop呀﹗

一點紅﹕唔係呀fa﹖你有乜咁多嘢做呀﹖

小子﹕你知唔知我呢個暑假要做幾多份閱讀報告呀﹖

一點紅﹕我諗…2份掛﹖

小子﹕2份﹖你當我流架﹗我升一年班嗰年都做5份啦﹗

一點紅﹕吓﹖﹗﹖﹗咁癲﹖

小子﹕唔係你估﹗我有20個中文閱讀報告 + 20個英文閱讀報告要做呀﹗

一點紅﹕堅定流﹖邊可能要做咁多﹖你D先生係咪癡Q線架﹖

小子﹕堅架﹗而家間間band 1學校都係差唔多架喇。

一點紅﹕吓﹐咁邊有時間享受假期呀﹖

小子﹕假期仲忙過番學嗰陣﹐我等陣仲要去上堂添呀﹗

一點紅﹕上咩堂﹖

小子﹕10點學游水﹐12點學英文﹐2點學長笛﹐4點學畫畫﹐6點學劍擊。

一點紅﹕唔X係呀﹖學咁多嘢﹖你得10歲咋喎﹗

小子﹕呃你把X咩﹖

一點紅﹕X﹗你做乜爆粗呀﹖我話俾你阿媽知架﹗

小子﹕噢﹗Sorry! 近得你多學埋你爛口﹗而家間間學校都話要『一體一藝』﹐我阿媽又唔知我邊樣有天份﹐咪幫我魚翁撒網亂報囉﹐佢話學多幾樣梗無蝕底。

一點紅﹕咁你真係辛苦過劉華喎﹗咁其實你鍾唔鍾意學呢D嘢呢﹖

小子﹕挑﹗梗係唔鍾意啦﹗一個人游水駛乜學晒四式呀﹖你有無見人去沙灘游蝶泳吖﹖

一點紅﹕又唔覺喎﹗

小子﹕(少許暴燥) 仲有呀﹐學長笛嚟做乜Q啫﹖第時溝女唔通攞碌笛出嚟吹咩﹖俾人笑X死啦﹗除非我將來搞基啦﹗

一點紅﹕估唔到你咁細個就知搞基係點…

小子﹕(勁暴燥) 你係咪聽緊我講嘢架﹖﹗﹖﹗仲有畫畫呀﹗我學極都唔係Banksy啦﹐同埋我連火柴枝公仔都畫得樣衰過人﹐唔通我有天份咩﹖

一點紅﹕咁又係嘅…

小子﹕(怒吼) 我未講完呀﹗﹗無啦啦做乜要我去學劍擊呀﹖中華英雄呀﹖扮狂十兒呀﹖係學都學中國劍術啦﹗

一點紅﹕(流汗) 你…你冷靜D先啦﹐我驚你爆血管呀﹗咁其實點解學校要搞D乜鬼『一體一藝』呢﹖

小子﹕因為D學校以為一個好學生要文武體藝樣樣皆能先至叻囉。

一點紅﹕難道你唔認為係﹖

小子﹕無錯﹐all-rounded係好嘅﹐不過你睇吓呢個世界多唔多文武全才嘅人﹖多數都係半桶水﹐無樣掂。唔係好多人係gifted嘅﹐夾硬要將一個細路迫向多方面發展﹐對個細路唔好﹐對父母又唔好﹐lose-lose。

一點紅﹕咁你有乜高見呢﹖

小子﹕我覺得讀書時期有一D好重要嘅嘢係無教嘅。你諗吓﹐學校係要令一個細路將來出嚟社會做事﹐可以有適當嘅技能﹑邏緝﹑態度﹑觀念先得。學埋D唔等使嘢有X用咩﹖

一點紅﹕咁你想學D乜呢﹖

小子﹕我想學理財﹐人一生就係為錢奔波﹐好多人因為無正確理財觀念﹐碌咭﹑亂花錢唔儲錢﹐結果營營役役。如果有人細細個就將 time value of money﹐compound interest rate﹐CAPM model, Black-Scholes equation等等了解透澈﹐將來生活實會過得更好﹗

一點紅﹕嘩﹗你咁有料到嘅﹖

小子﹕我仲想學public speaking & communication。人成世都要同人溝通﹐有效嘅溝通方法可以事半功倍﹐如果有埋negotiation & questioning skill就更正啦﹗

一點紅﹕你…係咪真係得10歲架﹖

小子﹕我仲想學打扮。正所謂人靠衣妝﹐大個咗如果識得著合適嘅衫﹐化合適嘅妝﹐好好裝扮自己﹐衣著得體﹐成功機會大好多﹗溝到仔/女機會都大好多啦﹗

一點紅﹕嘩﹗你識咁多嘢﹐可唔可以教吓我﹖

小子﹕睇你個樣都無乜天份架喇﹐你求其學番門手藝﹐嗱嗱淋投個靚胎把啦﹗

一點紅﹕信唔信我斬你吖嗱﹗

by一點紅@沉睡森林

小子﹕一點紅哥哥﹐成年無見喇喎﹐你死咗去邊呀﹖

一點紅﹕唔駛做咩靚仔﹖點呀﹖咩料呀﹖我好忙呀﹗

小子﹕我想請教你一個問題呀﹕點解D人會搞婚外情嘅﹖

一點紅﹕婚外情就婚外情啦﹐做乜加個『搞』字﹖學埋D大陸話﹗

小子﹕OK﹐OK﹐點解D人會有婚外情嘅﹖

一點紅﹕點解咁問呢﹖

小子﹕因為我有個 friend個老豆老母炒哂大鑊﹐就係因為婚外情。

一點紅﹕(徐徐呼出一口煙圈) 婚外情喱家嘢真係好麻煩。我都識D人有喱個問題。其實婚外情並唔一定發生係男人身上﹐女人亦都會搞婚外情…

小子﹕一點紅哥哥﹐婚外情就婚外情啦﹐做乜加個『搞』字﹖學埋D大陸話﹗

一點紅﹕頂你個肺﹗你係咪想死﹗

小子﹕嘻嘻…乜兩個人唔係結得婚就會好愛對方㗎咩﹖點解仲會有婚外情嘅﹖

一點紅﹕其實兩個人結婚嗰個moment就梗係好愛對方啦﹐但係時間耐咗就會變㗎喇。有D夫婦過咗幾年就會覺得結婚後見得太多﹐磨擦就會多﹐自然覺得煩。而且大部份女人覺得嫁咗就等於完成人生任務﹐於是漸漸疏於保養﹑扮靚﹐兩三年就變成一個肥C9 。

小子﹕﹖﹖乜嘢係肥C9﹖

一點紅﹕肥師奶呀﹗﹗唔個阻住我講嘢啦﹗﹗而且當一個男人越漸成熟﹑事業越進步嘅時候﹐又自然會識到條件更好嘅女人。個男人一 compare﹐就發覺屋企件C9同眼前嘅索女無得比。加上如果個女人唔 mind個男人結咗婚﹐就更加易撻著﹗

小子﹕個女人點會唔mind個男人結咗婚啊﹖

一點紅﹕喱D你就唔明喇﹗而家香港有30%以上嘅婚姻係香港男人娶大陸女仔﹐久而久之﹐香港就會剩餘大量未婚女性﹐喱D女人係無得揀嘅情況下﹐有可能會揀D結咗婚嘅男人﹐博一博自己會爭得贏佢老婆囉﹗

小子﹕咁又爭唔爭得贏呢﹖

一點紅﹕好難講﹐要睇手段。但係無論贏同輸﹐都有人唔開心﹐而且件事多數都會揚哂﹐對3個人都無好處。

小子﹕照你咁講﹐喱個 lose-lose 情況﹐無理由要搞婚外情喎﹖

一點紅﹕所謂當局者迷﹐唔係個個都咁 conscious 嘅。而且好多人都好懷念拍拖嘅戀愛感覺﹐加上以為自己控制得到﹐所以不惜以身犯險。有D有品D嘅男人﹐會一早講明自己有老婆﹐訂明遊戲規則﹐願者上釣。但係有D衰格嘅﹐就唔認自己結咗婚﹐出去呃女仔。

小子﹕咁D女仔咪好慘﹖

一點紅﹕係㗎﹐我會建議喱D女仔如果知道個男人有老婆﹐就直接揾個老婆攤牌﹐等個老婆飛咗個男人之後﹐自己都飛埋個男人﹐等佢兩頭唔都岸﹗

小子﹕咁女人呢﹖點解女人會去偷食呢﹖

一點紅﹕唔好講到偷食咁難聽﹗我覺得女仔會去識第二個男仔一般都係兩個情況﹕(1) 個老公有第二個﹐出於報復心態﹐自己都揾番個﹔(2) 自己結婚時年紀太細﹐未玩過﹐婚後發現個世界原來有咁多筍盤﹐所以想揾個好D。

小子﹕咁結果呢﹖

一點紅﹕同男人一樣﹐都係搞到一鑊泡居多。

小子﹕如果你老婆有婚外情﹐你會唔會原諒佢呢﹖

一點紅﹕關你乜事﹖

小子﹕你答咗我先啦﹗

一點紅﹕我會。因為佢揀得第二個﹐一定係我有D唔好嘅地方﹐我會諒解。

小子﹕好嘢﹗

一點紅﹕好乜嘢﹖

小子﹕吓﹖…無…無嘢呀

一點紅﹕(拎出一把2尺開山刀) 講﹗

小子﹕(逃跑中) 我諗吓咋﹗我覺得你老婆都好索吓…我…我諗吓咋﹗

相關閱讀﹕與小子談沉船

By 一點紅@沉睡森林

小子﹕好多謝一點紅接受沉睡森林嘅專訪﹐我首先代表沉睡森林多謝你。

一點紅﹕你邊位呀﹖你有乜資格代表沉睡森林呀﹖唔好扮哂代表嘞﹗你條靚仔只不過係我哋虛構出嚟架咋。你咁寸﹐我哋以後都唔寫“與小子談XX” ﹐等你無機會出場吖嗱﹗

小子﹕吓…唔…唔駛玩到咁大啩﹗

一點紅﹕驚哩﹗等你咁得慼吖嗱﹗

小子﹕不…不如我哋做番訪問喱﹖

一點紅﹕好啦。

小子﹕你仲記唔記得你第一篇發表嘅文章係邊一篇﹖

一點紅﹕唔…應該係“偉大的中文”吧。

小子﹕咁你自己最鍾意係邊一篇呢﹖

一點紅﹕真係好難揀。老實講﹐篇篇我都幾鍾意﹐但係又無一篇我真係超鍾意﹐所以答案係無嘅。

小子﹕你點解會開始寫 blog 嘅﹖

一點紅﹕因為我都好有興趣同大家分享一下我D歪理。好多時係日常生活中﹐你唔會無啦啦同人討論問題架嘛﹐所以我覺得係沉睡森林發表吓意見都唔錯。

小子﹕哦。多謝哂你寶貴嘅時間﹐今日我哋嘅訪問就到此為止嘞。

一點紅﹕吓﹖咁快﹖

小子﹕係啊﹐我係準備咗咁多問題咋。你估你係劉德華呀﹖我哋又唔係志雲飯局﹐邊度得閒同你玩咁耐呀﹖

一點紅﹕死仔包﹗我一場嚟到你唔係就咁叫我走吓話﹖你起碼都問多一陣啦﹗

小子﹕問咩呀﹖

一點紅﹕求其啦﹐揾D嘢問吓啦﹗

小子﹕…你…你鍾意食D咩呢﹖

一點紅﹕我最鍾意食日本嘢﹐仲有中式點心同埋上海菜。

小子﹕如果任你揀﹐你最想同邊個人食一餐飯﹖

一點紅﹕死咗得唔得﹖

小子﹕是但啦﹐喱D都唔會登架啦﹗

一點紅﹕我會揀張國榮。

小子﹕你最鍾意邊一套電影﹖

一點紅﹕Shawshank Redemption (中文譯名﹕月黑高飛)

小子﹕你最想偷邊三件藝術品﹖

一點紅﹕羅浮宮嘅勝利女神像﹐王羲之嘅快雪時睛帖﹐同埋故宮入面用玉雕成嘅肥豬肉。

小子﹕你試過放入口嘅最怪嘅嘢係乜﹖

一點紅﹕12條層層疊積木。

小子﹕如果你嘅一生要拍成一部電影﹐你想揾邊個飾演你自己﹖

一點紅﹕梁朝偉。

小子﹕你最憎邊個﹖

一點紅﹕司徒華。

小子﹕當今在生嘅人﹐你最想做邊一個﹖

一點紅﹕唔…劉鑾雄。

小子﹕係咪因為佢可以包明星﹖

一點紅﹕唔係。包明星好多人都得啦。但係佢有錢之餘我行我素﹐我好欣賞。

小子﹕咁當今世上你最想包邊個明星﹖

一點紅﹕嘩﹗點揀呀大佬﹖揀多幾個得唔得呀﹖

小子﹕梗係唔得啦﹗淨係准揀一個﹗

一點紅﹕… 唔…唔…我會揀容租兒。

小子﹕﹖﹗

一點紅﹕係。係容祖兒﹗無錯﹐雖然佢唔算好靚女﹐但係我覺得佢個人好開朗﹐好有活力﹐而且鬥志頑強﹐我本身好鍾意佢。

小子﹕但係而家係講包明星喎﹐唔係10大傑出青年喎﹐要咁上進做乜先﹖

一點紅﹕你要欣賞一個人先會想包佢架嘛。

小子﹕但係你自己話愛與性係無關係架喎。(編者按﹕參閱愛與性的邊緣)

一點紅﹕你唔好窒頭窒勢啦﹐靚仔﹗

小子﹕…

一點紅﹕繼續啦﹗

小子﹕咁如果可以俾你揀兩個人起雙飛﹐你會揀邊兩個呢﹖

一點紅﹕你喱D咩問題嚟架﹖喱個訪問係想點架﹖

小子﹕答唔答﹖唔答就成篇訪問都唔登﹗

一點紅﹕仆街仔﹗點答呀﹖好難揀喎﹗等我諗陣先﹗

小子﹕zzz……….

一點紅﹕我揀唔到呀﹗

小子﹕唉算啦。今日就玩到喱度啦。咁鬼煩﹐下次喱D訪問唔好攪我﹗

一點紅﹕大家咁話﹗

*  *  *

你又會揀邊兩個呢﹖

By一點紅@沉睡森林

小子﹕嘩﹗一點紅哥哥﹐我尋晚撞鬼呀﹗

一點紅﹕咁邪﹖唔係呀 fa?

小子﹕係呀﹐我尋晚瞓瞓吓醒咗﹐點知全身都郁唔到﹐想叫又叫唔出聲﹐想擘大眼又唔得﹐真係好驚呀。搞咗一陣先郁得番咋﹗喱D係咪俾鬼責啊﹖

一點紅﹕係呀。

小子﹕咁我屋企咪即係有鬼﹖要唔要揾個高人嚟起番個壇﹐做場法事咁呢﹖

一點紅﹕所以話你係靚仔即係靚仔﹐邊得有咁多鬼呢﹖

小子﹕唔係鬼﹖咁係邊個責住我呢﹖唔通係我張被重得滯﹖

一點紅﹕等我用科學嘅角度解釋俾你聽啦﹗其實一個人係睡眠嘅時候﹐腦部唔同嘅位置會有唔同程度嘅休息嘅。例如控制意識(consciousness) 嘅部份休息就代表你無意識嘞。但係一D深層D嘅功能係唔會點休息嘅﹐例如控制心跳、呼吸喱D機能嘅腦部係永遠都唔可以休息嘅﹐因為佢一休息你就會瓜柴架喇。仲有﹐其實有D部份(例如聽覺﹐觸覺) 只係會輕微休息架咋﹐所以鬧鐘響你會聽到﹐瞓瞓吓有人打你你都會醒嘅。

小子﹕哦…但係關俾鬼責乜事呢又﹖

一點紅﹕咪心急啦﹐就講到啦。之所以會俾鬼責﹐就係出現喺腦部唔同部份唔係同時瞓﹐同時醒喱一點上面。當一個人控制思想同埋意識嘅部份醒咗﹐但係控制肌肉同埋活動嘅部份仲未醒﹐就會發生全身郁唔到但係又清醒嘅情況嘞﹐以前D人就叫喱D做俾鬼責囉。你有無留意俾鬼責一般都係喺就嚟瞓醒嘅情況下出現呢﹖同埋多數好快(幾分鐘內) 就會郁得番呢﹖

小子﹕係喎﹗

一點紅﹕所以呢﹐凡事唔好咁迷信﹐有好多嘢都係有科學解釋嘅﹐唔駛吓吓都搬哂滿天神佛出嚟嘅。

小子﹕咁喱個世界即係無鬼架啦﹖

一點紅﹕(陰森地) 咁又未必…

小子﹕吓﹖…你又嚟嚇我呀﹖

一點紅﹕其實所謂鬼﹐只不過係代名詞嚟。當我哋見到D不能解釋嘅現象嘅時候﹐就會好攏統咁叫做鬼。一般人所謂撞鬼主要都係有幾個情況嘅﹕(1) 見到鬼﹔(2) 聽到鬼講嘢﹔(3) 鬼上身。而佢地嘅共通點就係通常只係有一個人見到/聽到﹐其他係現場嘅人係完全見唔到嘅。係外國有好多科學家都有研究喱D靈異情況﹐佢地歸納咗一套有科學 back up 嘅理論﹐我覺得好 make sense。

小子﹕快D講嚟聽吓啦。

一點紅﹕我地都知道人腦係由好多個腦細胞 (neurons) 所組成嘅﹐而當我哋思考嘅時候﹐D腦細胞就會發出非常微弱嘅電流去隔離個腦細胞度﹐如此類推﹐所以我哋個腦其實係行電嘅。而所有有電流嘅電路 (Circuit) 都一定會產生電磁波 (Electromagnetic Wave) ﹐而我哋個腦就會產生一種好微弱嘅腦電波嘞。以我地現時嘅科技暫時仲未明白到腦電波嘅內容﹐但係腦電波同其他電波一樣﹐都會係我哋周圍嘅空間傳播嘅。於是科學家就認為﹐撞鬼其實就係我哋個腦無意中接收咗人哋嘅腦電波﹐而產生出嚟嘅視覺/聽覺效果嘞。

小子﹕點會呀﹖無啦啦點會接收到呢﹖

一點紅﹕點解唔會呀﹖你有無試過聽收音機無啦啦接收到人哋酒樓D對講機講嘢吖﹖

小子﹕有就有﹐但係我哋個腦都無接收能力﹐點會收到 signal呢﹖

一點紅﹕點會無呀﹖所謂心靈感應就係啦﹐只不過我哋未掌握到具體嘅操作方法啫。

小子﹕原來係咁﹗多謝哂喎。

一點紅﹕唔好客氣啦﹐靚仔。

小子﹕(牙關打震) 你…你後面有隻鬼啊﹗披頭散髮﹐好…恐…怖..啊﹗

一點紅倏然轉身。

一點紅﹕阿媽﹐咁啱嘅﹖

紅媽﹕條靚仔啱啱話咩見鬼呀﹖我個新髮型好肉酸咩﹖

一點紅﹕(磨刀聲) ﹐唔駛理佢﹐佢傻架。我宜家就去劈死佢﹗

小子﹕吓﹖﹗又嚟﹖救命啊﹗

By 一點紅@沉睡森林

小子﹕我喱排好黑仔。

一點紅﹕有幾黑仔呀﹖

小子﹕喱幾日唔知乜事俾阿媽日日狂鬧。總之有理無理都鬧一餐﹐好似食咗火藥咁。我做乜都睇唔順眼﹐仲慘過DD。

一點紅﹕阿媽鬧你都好正常啫﹐你咁仆街﹐我直頭想打你啦﹗

小子﹕唔係架﹗我阿媽平時無乜嘢架﹐係唔知點解每個月都有幾日特別躁D咋。

一點紅﹕哦﹗一定係姨媽到啦﹗

小子﹕姨媽﹖我姨媽晨早移咗民喇喎﹐十幾年都未番過嚟喎。

一點紅﹕戇居仔﹐我係話M到啊﹗

小子﹕M到﹖﹗﹖﹗

一點紅﹕月經啊﹐白痴仔﹗

小子﹕吓﹖月經會鬧人架咩﹖

一點紅﹕哈﹗你有所不知喇靚仔。女人喺經期期間係千萬不能惹的﹐因為肉體上嘅不適﹐加埋 Hormones 嘅影響﹐係可以將一個賢良淑德嘅少女變成一隻凶殘無比嘅猛獸架。

小子﹕吓﹖堅唔堅呀﹖

一點紅﹕你自己都話俾阿媽狂小啦﹐係咪﹖

小子﹕咁…咁…咁有乜方法將傷亡減到最低呢﹖

一點紅﹕以我行走江湖咁多年﹐梗係有必殺技啦﹐唔係我邊捱到今日呀﹖

小子﹕一點紅哥哥﹐快D講嚟聽啦﹗

一點紅﹕其實女人(或者女仔) 喺M到嘅時候係有D特徵嘅﹐只要你平時俾D心機留意佢地嘅行為﹐就可以知到端倪。(1) 去廁所時一定拎個大袋﹐而且次次去好耐﹐因為要換M巾﹔(2) 黑眼圈﹐女仔M到好易會有黑眼圈嘅﹔(3) 胸部漲大﹐如過你突然發現你阿媽個胸升咗Cup﹐好可能佢係姨媽到﹗

小子﹕睬過你﹗我點會成日望阿媽個胸啫﹖

一點紅﹕咁就唯有行 Plan B喇…

小子﹕Plan B?????

一點紅﹕無錯﹐就係狂叫佢食生冷嘢﹐涼嘢。例如西瓜﹐綠豆沙﹐雪糕之類。

小子﹕咁會無咁躁嘅咩﹖

一點紅﹕唔會。只係會狂痾血﹐等佢失血過多無力鬧你。

小子﹕你都忽忽哋架﹗

一點紅﹕哈哈﹗

小子﹕係嘞﹐唔知點解我4個家姐每個月都係差唔多時間鬧我架喎﹐唔通佢哋約埋一齊M到﹖

一點紅﹕係呀。係醫學上有一個現象叫做『月經同步』 (Menstrual Synchronization) ﹐即係話如果一班女人經常一齊生活(例如﹐女囚犯﹐寄宿學生) ﹐佢哋嘅經期就會慢慢同步﹐即係話所有女仔都會差唔多時間M到﹐好奇妙架﹗

小子﹕點解會咁嘅呢﹖

一點紅﹕暫時都無一個非常好嘅解釋﹐但係就有好多數據支持哩個現象。或者遲D先會有人解得開喱個謎團。

小子﹕你條女喱排都M到喎。

一點紅﹕係呀﹐真係煩啊。……. 咦﹖你點知嘅﹖

小子﹕哦﹐我見佢個胸又大咗之嘛。係呢﹐佢上個月都無咁大架喎

一點紅﹕(陰森地) 你咁留意佢個胸嘅﹖

小子﹕係呀﹐我日日都芨住佢嗰度架啦。

(磨刀聲)

一點紅﹕點解次次到最後都要斬你架﹖死仔﹗﹗﹗

小子﹕吓﹗又嚟﹖救命啊﹗

by 一點紅@沉睡森林

小子﹕一點紅﹐好耐無蒲頭喎﹐死咗去邊啊﹖

一點紅﹕無啊﹐掛住去溝女囉。

小子﹕咁溝唔溝到呢﹖

一點紅﹕溝鬼咩﹐我又樣衰﹐又無錢﹐得嗰5尺1寸。

小子﹕…

一點紅﹕係呢﹐我尋日沖涼悟出咗一個道理。

小子﹕沖涼悟出乜嘢道理呢﹖

一點紅﹕就係﹐原來沖涼係好複雜嘅﹗

小子﹕發神經啦你﹐沖涼有幾複雜啊﹖

一點紅﹕哈﹐你有所不知喇﹐靚仔。我問你嘞﹐你平時沖涼沖幾耐架呢﹖

小子﹕咪沖10分鐘囉﹗

一點紅﹕果然﹗你係唔識沖涼嘅﹗我尋日行行吓﹐唔小心跌咗落條坑渠度﹐全身上上下下都污糟哂﹐於是返到屋企就即刻標去沖涼啦。一度沖我就一度小心清潔我身體嘅每一個部位嘞。然後我就發現原來有好多位我平時都無洗架﹗

小子﹕例如呢﹖

一點紅﹕耳仔喇。你有幾何用番“柬” 洗耳仔呢﹖耳背呢﹖下巴呢﹖肚臍呢﹖腳趾嚹呢﹖腳趾甲呢﹖腳板底呢﹖

小子﹕咦﹖又真係好少洗喱D位喎。

一點紅﹕我以前去過D上海浴室刷背﹐嘩﹐個師傅刷咗成30分鐘﹐D老泥有成碗飯咁滿啊﹗所以我哋以後沖涼都係要洗得徹底D先得喇﹗

小子﹕D老泥有成碗飯咁滿….

一點紅﹕係啊﹗個師傅好抵死架﹗特登將D老泥捽哂去你個心口度﹐堆埋一堆俾你睇吓有幾多架。你睇佢係你身上捽到咁多老泥﹐你都會唔好意思啦﹐所以會俾多D貼士架。

小子﹕我…想…嘔….

By 一點紅@沉睡森林

一點紅在撩鼻屎…先是尾指﹐繼而用食指﹐最後用姆指同食指將一舊鼻屎鉗出嚟…

小子﹕喂﹗你無嘢呀﹖大街大巷撩鼻屎﹖

一點紅﹕撩鼻屎有乜問題﹖唔通你無鼻屎嘅﹖

小子﹕有就有﹐但係唔會通街撩囉﹐咁肉酸﹗

一點紅﹕咁你會係邊度撩呢又﹖

小子﹕唔…係廁所啦﹐又或者係無人見到嘅時候啦。

一點紅﹕咁即係話你都會撩﹐不過唔會通街撩啦﹐因為肉酸﹐係咪﹖

小子﹕係…係啦

一點紅﹕咁我覺得你好虛偽喎﹐明明想撩鼻屎又要扮嘢。咁如果我唔怕俾人覺得我肉酸﹐我係咪可以係人面前撩鼻屎呢﹖

小子﹕梗係唔係啦﹐唔通你唔怕俾人覺得肉酸﹐又可以隨街痾尿咩﹖

一點紅﹕咁唔同喎靚仔﹐通街痾尿會整污糟地方喎。只要我撩完舊鼻屎用紙巾包住﹐咁咪無問題囉﹖

小子﹕吓﹖咁你隻手仲有痴到啲鼻水架喎﹐大佬﹗

一點紅﹕咁D人打乞嗤用隻手遮住個口﹐隻手夠有口水啦﹐又唔見人話佢地唔清潔﹖

小子﹕總之你通街撩鼻屎就係無禮貌啦﹗

一點紅﹕無禮貌﹖如果你有舊眼屎﹐遮住你視線﹐你抹咗佢﹐保持儀容清潔﹐唔通咁又無禮貌﹖如果你有舊鼻屎﹐阻住你呼吸﹐你撩咗佢咪一樣﹖

小子﹕無啦啦點會有咁多鼻屎吖﹖你跟本就係打橫嚟講﹗

一點紅﹕你有所不知喇﹐鼻屎其實係鼻分泌出嚟嘅鼻水﹐黏到空氣中嘅塵埃而成嘅。而家香港空氣咁差﹐空氣中咁多微粒﹐人人都有好多鼻屎架啦﹗我有鼻屎都係因為大家做成嘅﹐你唔可以怪我架喎﹗

小子﹕我都費事同你癲﹗咦﹖你舊鼻屎呢﹖

一點紅﹕我自己食番啦﹐環保D吖嘛﹗

小子﹕嘔……

by 一點紅@沉睡森林

小子﹕一點紅哥哥﹐台灣陳水扁今日發表講話﹐話明年總統大選要順便公投埋以台灣名義入聯合國喎﹐你點睇呀﹖

一點紅﹕無乜點睇嘅﹐佢鍾意講乜都得﹐最緊要係會唔會通過啫。

小子﹕咁你覺得佢點解成日都想搞台獨嘅﹖

一點紅﹕哦﹐一個人戀棧權力﹐就會想連任﹐連任完又唔捨得走﹐就唯有做D嘢名流青史囉。而且台灣中部同南部D民眾好單純﹐陳水扁利用台獨嚟拉選票啫

小子﹕咁你認為台灣會唔會獨立呢﹖

一點紅﹕我覺得唔會﹐亦都唔應該。首先﹐台灣人民好大部份係由中國去嘅﹐當中亦有好多人有親戚朋友係大陸﹐如果台灣宣佈獨立﹐大陸一定會派兵打佢﹐都時親戚朋友兵戎相見﹐所以台灣人民一定唔會支持。況且有邊個想打仗吖﹖台灣有調查過﹐支持台獨嘅人好似唔夠30%﹐所以唔會獨立。

小子﹕咁點解台灣唔應該獨立呢﹖

一點紅﹕學大陸話齋﹐“台灣係中國不可分割的一部份” 。查番歷史﹐台灣早係幾萬年前已經有人類嘅蹤影﹐到咗元朝被納入福建省泉州府嘅範圍﹐可以話係最早有歷史嘅管轄證據。到咗1604年﹐荷蘭人攻佔台灣﹐明朝廷派兵驅離逐荷蘭人﹐後來荷蘭同西班牙分別進佔台灣﹐最後鄭成功係1661年成功收復台灣。由嗰陣開始﹐台灣就俾鄭成功嘅政府管治嘞﹐一直到1683年﹐鄭克塽向清朝投降，結束鄭氏三代係台灣23年嘅統治。就係咁﹐台灣就一直俾清政府管理﹐成為中國其中一個行政區嘞。後來馬關條約將台灣割咗俾日本仔﹐二次大戰後﹐又論到國民政府管理﹐直到宜家。

小子﹕咁睇落台灣又真係幾似中國一部份喎。

一點紅﹕梗係啦﹐所以台獨就唔駛諗喇。

小子﹕咁你覺得台灣應唔應該回歸祖國呢﹖

一點紅﹕我覺得應該﹐而且一定會發生。你睇香港、澳門都已經回歸咗﹐台灣將來都一定會回歸架喇。可惜鄧小平死得早﹐唔係搞掂埋台灣就好喇。

小子﹕你估要幾耐呢﹖

一點紅﹕咁講真﹐要回歸唔係一時三刻可以做到嘅﹐起碼兩方面都有人肯傾先得架嘛。香港由中英聯合聲明到回歸都15年啦﹐出年如果小馬哥贏咗﹐可能20年30年左右啦。

小子﹕但係D台灣人咁唔鍾意大陸﹐點會俾你回歸呀﹖

一點紅﹕喱個問題就唔到我地諗喇﹐等北京自己諗掂佢啦﹗總之第時去台灣唔駛攞台證就得啦﹗

by 一點紅@沉睡森林

（飯局中）

小朋友：熊貓叔叔，好像有很多東西還沒有吃完呢？

熊貓：對啊！誰點了這麼多菜？

小朋友：大家也有份點的，剛才你說一人點一個菜嘛，你不是老人痴呆吧？

熊貓：咁寸？吃飽了就走吧，要不然就打包走人．

小朋友：喂．．．等等．．．媽媽跟我們說要珍惜食物，不如我們吃完才走吧？

熊貓：你吃吧，我不吃，吃不完又不打包就讓它放著吧．

小朋友：你這樣就不對了，所謂“粒粒皆辛苦”，農夫種田是很辛苦的，每粒飯都是有血有汗的．

熊貓：誰教你這些的？農夫種田辛苦和浪費米飯有什麼關係？你把這些飯菜吃完他就不辛苦了嗎？

小朋友：但是．．．啊！對了，人家說“非洲的小朋友沒飯吃，所以我們更不應浪費．”

熊貓：哈哈！是否你把飯菜都吃完，非洲小朋友就有飯吃？

小朋友：（牙癢癢的．．．）那也不是．．．

熊貓：對啊！其實中國有很多傳統訓誡，如果你不會獨立思考，是很容易跌入圈套的．吃飯罷了，不用想太多人家有沒有飯吃，耕田辛不辛苦等等．杜甫有句詩：“安得廣廈千萬間，大庇寒士俱歡顏”，是很傳統的中國人酸腐．我們香港人一定要實際，你覺得非洲小朋友沒飯吃，你就把你的零用錢捐給他們吧．千萬不要像大陸人一樣，只懂慨嘆，貢獻就一點都沒有．

小朋友：大陸人是這樣的嗎？

熊貓：他們只活在共產黨烏托邦世界裡，最喜歡陷入那種“朱門酒肉臭，路有凍死骨”的憎人富貴厭人貧的快感裡．人家有本事酒肉臭，自有他的因，凍死骨也是一樣．

小朋友：那熊貓叔叔你是不是在鼓吹浪費呢？

熊貓：千萬千萬，一定要記住，不要用大陸式的思維去看待別人的說話．大陸人“非黑即白”的思維是最可怕的．你跟他說台灣人有台獨思想藉得體諒，他就問你是否贊成台灣獨立．你跟他說日本軍人裡也有人同情中國人，他就問你是否忘記了南京大屠殺．我沒有鼓吹浪費，我只是想你有你自己的想法而已．

小朋友：但是．．．吃不完就走好像很浪費．

熊貓：吃不下的食物就是垃圾，把垃圾丟進垃圾桶比丟在自己的胃裡有公德心一百倍．今天香港人都是資源過盛的，反而我們點菜時不應受饑餓感擺佈，這就夠了．

（這時，一個八婆走近）

八婆：哇！吃剩這麼多東西，下世一定無飯食！

熊貓：八婆！我前世是餓死架！

by大熊貓＠沉睡森林

小子﹕落花流水哥哥﹐你鍾唔鍾意飲酒架﹖

落花流水﹕一時時啦﹐以前飲多D﹐宜家因為要注重健康所以飲少好多囉

小子﹕咁你最鍾意飲乜嘢酒架﹖

落花流水﹕我最鍾意紅酒同埋日本清酒

小子﹕日本清酒﹖你唔係好憎D日本人架咩﹖點解會飲清酒架﹖

落花流水﹕哦﹐我飲哂D清酒佢地咪無得飲囉﹗哈哈﹗

小子﹕我成日見到D清酒﹐支支都差唔多﹐不如你講解吓俾我知﹐等我下次識得揀啦

落花流水﹕日本清酒係由米釀出嚟嘅酒﹐由成份嚟講可以分為兩大類﹕(1) 純米酒﹐即係話D酒由頭到尾都只係靠米發酵變成酒精﹐無任何添加劑﹔(2) 本釀造﹐喺米發酵變成酒精嘅過程﹐釀酒廠會適量加入一D酒精﹐令到支酒香美更加濃。所以揀 Sake ﹐首先要決定你鍾意飲純米酒定係本釀造。一般嚟講純米酒米味好重﹐比較清淡﹐而本釀造就會香D﹐但係就無咁有米味。

小子﹕之後又點呢﹖係咪愈貴就愈好飲呢﹖

落花流水﹕唔好咁膚淺啦﹐學埋大陸人D嘢﹐平酒一樣可以好好飲架。之後就要講解少少釀酒嘅道理俾你知啦。釀酒嘅米係唔可以就咁攞去釀酒嘅﹐因為一粒米係有好多雜質嘅﹐雜質主要喺米嘅表面﹐所以首先要用機器磨咗米嘅表面去﹐如果唔係釀出嚟嘅酒就有雜味。喱個過程叫做“精米”。

小子﹕咁粒米要磨幾多先啱呢﹖

落花流水﹕一般磨20%-60%不等。愈磨得多﹐釀出嚟嘅酒就愈醇﹐但係就愈貴。大部份清酒嘅 Label 有一個叫“精米步合” 嘅指數﹐“精米步合70%”就代表有30%嘅米係磨咗走﹐而“精米步合40%” 就代表有60%嘅米係磨咗走﹐支酒會貴D

小子﹕咁乜嘢叫做“吟釀” 呀﹖

落花流水﹕日本政府規定﹐唔同精米步合嘅酒係有唔同名嘅﹐你可以參考喱個表

所以“吟釀” 係用嚟型容支酒有幾醇嘅一個專業用詞

小子﹕除此之外﹐仲有乜要留意呢﹖

落花流水﹕仲要留意“日本酒度”。“日本酒度” 係形容支酒有幾甜嘅。最甜 (甘口) 係 -30度﹐而最唔甜 (辛口) 就係 +15度。如果支酒係 +3度即係有少少 dry 咁嘅意思喇。

小子﹕咁清酒係應該凍飲定係熱飲呢﹖

落花流水﹕好難講﹐因為支支唔同﹐不過大部份都可以凍飲。

小子﹕咁你有無邊隻飲開可以介紹吓呢﹖

落花流水﹕如果粗飲﹐就求其去百街買支盒裝“菊正宗”喇。1.8L 賣百零蚊﹐平過飲橙汁。我個人就比較鍾意“李白特別純米酒”﹐750 mL 賣$130﹐City Super 有售。非常好飲又抵飲﹐我自己成日飲。

小子﹕你試吓喱隻好唔好味﹖(小子攞出一細杯酒俾落花流水品嘗)

落花流水﹕嘩﹗好正喎﹗香醇美味。乜嚟架﹖

小子﹕“上善如水大吟釀”

落花流水﹕嘩﹐你真係夠老友﹗喱支嘢成千幾銀﹐我自己都有一支唔捨得飲。你攞嚟孝敬我﹐真係要買番件玩具俾你玩﹗

小子﹕咁又唔駛﹐你唔好打我就得喇﹗

落花流水﹕我無啦啦做乜事要打你呢﹖咦﹖咪住先﹗你得10歲﹐邊有錢買支“上善如水大吟釀” 呀﹖

小子﹕我…其…實…支酒係你嘅

落花流水﹕仆街仔﹗偷酒飲﹖點解次次到最後我都要打你嘅﹖

by 落花流水@沉睡森林

PS﹕這次一改風格學一點紅兄寫文﹐似模似樣吧﹗